Time Graad R

Boodskap 4

Jong kinders leer uit alles wat hulle om hulle sien en hoor. Dit is dus belangrik om hulle te help om hul vermoë om goed te kyk en te luister, te ontwikkel. Kyk- en luisterspeletjies bied kinders talle geleenthede om te oefen om te luister.

Klik hieronder om na teks te luister

Wanneer kinders teken, besef hulle dat iets deur ʼn prent op papier voorgestel kan word. Dit is ʼn belangrike stap vir jong kinders. Kinders maak dalk eers net merke op die papier wanneer hulle begin teken. Dit is belangrik om kinders in hierdie fase aan te moedig en te ondersteun, en nie hul tekeninge te kritiseer of hulle te vra om dit te verbeter deur jou tekening na te boots nie.

Dit verg tyd en oefening in ʼn veilige ruimte om ʼn nuwe vaardigheid aan te leer. As ons vir kinders se foute lag of hulle in die verleentheid stel, sal hulle dalk nie dapper genoeg voel om weer te probeer nie.

Help jou kind om eers te dink wat hy wil teken en laat hom dan probeer. Hy maak dalk krabbels en merke om letters voor te stel, en dit is te verwagte. Jou kind se tekenvermoë sal met verloop van tyd verbeter. Prys hom dus gereeld en moedig hom aan op sy reis om ʼn skrywer te word.

Kinders is mal daaroor as volwassenes saam met hulle aan ʼn aktiwiteit deelneem. Gesels met jou kind oor sy tekeninge en skryfpogings. Vra baie vrae wat tot meer gesprekke kan lei. Dit sal jou kind se woordeskat uitbrei en hom ook trots laat voel op dít wat hy reeds bereik het.